問題(problem), 問題 (question)

好奇一問: 若一問題(problem)搞咗好耐都未解決,會唔會因為問錯問題(question)? 定係大家已經習慣咗個問題,問題變咗做話題 (topic),傾下就算,千秋萬代傾落去? (讀方法學上的討論爭論,有感而問)

早咗,因為以為遲咗

超搞笑: 今朝有嘢做,見9:45,趕頭趕命搭車出去。一路都有睇手機,就到嘅時候,望一望幾點 ... 9:17?手機時間錯咗?望下街啲鐘,真係9:17喎!我睇咗8:45做9:45,早咗一個鐘喎!

功課: 我都係睇跳字鐘安全啲。

感動兼安慰

呢兩日好感動。因事我呢兩朝要一個搞兩個小朋友起身返學,撞啱又多嘢做,要多工運作,但佢地都好合作。噚朝阿仔叫兩叫就起身,重有時間畫一陣圖畫先出門口。今朝重係阿女早起過我,幫手叫阿仔起身,佢又聽家姐話。小小阻滯緊有,但總括嚟講好合作。好安慰。^^

感動兼安慰

呢兩日好感動。因事我呢兩朝要一個搞兩個小朋友起身返學,撞啱又多嘢做,要多工運作,但佢地都好合作。噚朝阿仔叫兩叫就起身,重有時間畫一陣圖畫先出門口。今朝重係阿女早起過我,幫手叫阿仔起身,佢又聽家姐話。小小阻滯緊有,但總括嚟講好合作。好安慰。^^

巴士報站

當然還有加強空間,例如未有預計到站時間,但巴士報站系統的確令等巴士更有預算。現在每次去到巴士站,都會開個 app 看一看。有了預算,即使等車需時,都不用浪費注意力去想「幾時先有車」。即使大塞車,都會知道情況有多壞,另作打算,不用白等。

唔係佢講咩?

問題或者唔係真相難辯,而係有時人根本唔在乎真相係點。「乜唔係佢講咩?有乜所謂啫。勵志有意思咪得囉。」啲名人好勁,成日都講啲冇講過嘅嘢(?!)。我見到呢啲勵志說話,都會試查下係咪真係佢講。(唔好學,好乞人憎,會冇朋友。) 我都一定會有錯,但如果我錯,我會希望有人話我知。我想知真相。

有團“火”

鐘意做或成日做,同有一團“火”去努力,係兩樣嘢。日日睇戲,定係日日睇戲寫筆記分析拍攝手法,諗點樣做好啲?日日打機,定係日日打機去鑽研或比較唔同打法,甚至捱苦去練,想做職業選手?日日食好嘢,定係日日食好嘢食到諗下點煮好嘢,創啲新菜色?鐘意做或成日做,同有團“火”去努力做,係兩樣嘢。

努力、堅持

今日聽李力持分享,佢用六個字總結:理想、努力、堅持。佢提到為咗做導演,曾經日日睇電影同做筆記,又謙稱佢嘅電影,有好多橋都唔係佢創出嚟,係睇睇埋埋返嚟。我隱約記得黃霑嘅散文亦提過,所謂創意都要靠平時吸收。佢平時一聽到有趣嘅事,就會用筆記簿記下,積積埋埋啲筆記,要創作時就有材料可用。台上戲內一分鐘,台下百年功。天才,有,但唔係你、你、你、同我。但有樣嘢,唔使天份都可以做:就係努力同堅持。^^

當然,到某個位,發覺真係有所限制,願意放手,去努力堅持另一條路,都係必需。努力堅持都唔係乜都得。就好似做研究,一個進路死做爛做都唔得,都要認真考慮一下,可能個進路真係唔得,要行第條路。

但我諗我地未努力堅持夠就放手嘅情況,多過太堅持唔識放手嘅情況。放手前,宜問下自己到底有幾努力同堅持先。

“不社交”媒體

忽發奇想:如果有一網站,用戶可以發帖,但完全不能知道幾多人看過,亦沒有讚等功能,讀者亦不能回應,不能分享。換之,完全單向,沒有互動。所發的帖,或有讀者,或有知音,或能影響生命,但作者無從得知。不知道甚麼人會選擇在這網站發帖?

市區嘅樹

今朝送完小朋友返學,喺黑沙環等巴士返學校。等得比較耐,但唔想睇電話,所以望咗啲樹好耐。上車繼續望路邊啲樹,望到亞馬喇。發現沿途其實好多好多樹,有啲重兩三層樓高,又有好多唔同樣嘅樹。樹嘅嘢,我完全唔識。唔知有冇人考究過,澳門市區種咗啲乜嘢樹?有冇甚麼《澳門市區樹木圖鑑》之類?

人肉滅蚊

噚晚廳有蚊,週圍飛,拍唔到。試下坐喺梳化,揸住蚊拍,以肉腿為餌,唔郁喺度等。又得喎,有三隻死喺我腳上。... 話俾太太知我嘅“成就"。佢好讚嘆,然後 ... 叫我入小朋友房,重覆以上動作。^^

(我其實好樂意嘅,我之後喺大人睡房都有試,雖然唔成功。)

[我都唔想咁滅蚊,大家有冇滅蚊大法介紹?]

諗嘢

好奇一問: 思考問題(有時俗稱”諗嘢”),即使未知有冇用,即使身邊人冇興趣,即使搵唔到錢,即使對事業未必有幫助 ... 即使唔知為乜,但思考問題呢樣嘢本身,令你快樂嗎?

瘀事一宗

瘀事一宗: 之前成日以為一部助聽器壞壞地,啟動時嘅嘟聲幾乎冇咗。但整機麻煩,遲遲冇去。早排見有優惠,就去驗耳,先發現原來部機冇壞,係隻耳高頻嗰度比幾年前跌咗10分貝。部機調整下就搞掂。

點瘀: 就好似近視深咗卻以為眼鏡濛咗。(唔想搞所以唔覺意唔諗?)

教訓: 勤啲去驗耳。^^

歸因轉,心情轉

噚晚放工時遇到啲事,都令我幾燥(我都係有喜怒哀樂嘅正常人)。去買飯,點知平時好好笑容個職員,今日又好 cool。本來有啲燥上加燥,但轉念一諗,我都可因一時之事有怒氣,佢都可以係突然有事啫。大家都係普通人,唔通我做客就可以黑下面,佢就要全天候一百分? 歸因轉,心情轉,心情都好返啲。

實體書

雖然好多呢排睇緊嘅書都係電子書,但重有啲排緊隊嘅中文書得實體書。決定平時出街要帶一本實體書喺身,間唔中搭車睇下實體書,唔好成日揸電話,即使有時係用電話睇書。:)

食麵

今朝煮麵做早餐,阿仔起咗身,我問佢食麵定食麵包,佢話食麵。煮煮下,阿女又起身。問佢食唔食,佢又話食。結果三個一齊開開心心食麵。幸福,其實好簡單。(太太平時返學日好辛勞,星期日我地會盡量安靜,俾佢休息下。:> )

你覺得自己整得靚唔靚呀?

幫阿仔整咗架紙巴士,佢問我:「你覺得自己整得靚唔靚呀?」我冇諗過佢會咁問,重要係問我感受,一時唔知點答。我「偽謙虛」咁答:「都OK啦。」佢跟住一臉真誠咁話:「我就覺得幾靚...(尾音拉長)」。

雖然我咁耐已經整咗超過十架,都好熟手,但重點唔係靚唔靚,而係佢會咁問。

快樂童年

希望兒女有快樂童年,不是要騙他們大人世界只有美好,是希望他們將來若見到經歷到世界的不美好時,能記起曾經快樂,能想起快樂是怎樣,仍能製造快樂。

(今早兩姐弟如常有些吵鬧爭執。但回校後,弟弟開心地買牛奶,家姐開心地祈禱,然後笑著說:「放學見。」令我思想為何希望他們有快樂童年。)

無限大?

阿仔阿女唔知喺邊度聽到"無限大",間唔中就問我,或討論/爭論"係咪最大"、"幾大"、"我大過你"之類. :p 我都要温下書:

Book Review: Infinity: A very short introduction by Ian Stewart
https://plus.maths.org/content/node/6795?nl=0

今天看完展覽,回家時在中港城碼頭等船。看到一隻鷹在海邊慢慢地盤旋。每飛一圈,都比之前飛得高一點。它由比碼頭高一點,飛呀飛,不經不覺便飛得比附近的摩天大廈還高得多。我很勉強先看到它。

我在書本上讀過這方法。但現場看鷹「示範」一次,那種驚歎同欣賞,是讀書讀不到的。甚至是看紀錄片,也不能有的。

所以雖然嘗試過,但最後沒有拍下來,寧願用眼觀賞。

Twitter 與中文

用多咗Twitter,發覺用中文好過用英文,因為同樣140個英文字母或中文字,中文能傳遞嘅資訊一般比英文多。英文可以用簡寫,但用太多,好多人會唔明。不過即使係中文,140字有時都唔夠講件事。後悔無學好文言文。:p 但用文言文,咪會好似用好多英文簡寫咁,好多人唔明?(剛好140字)

從女兒身上學到兩件事

陪兩姐弟睡,弟弟嚷著要抱住三架大玩具車睡。易受傷我不許,但軟硬兼施仍不得要領。阿女一直幫口,溫柔有耐性地情理並施去氹他。後來我嘗試不作聲,靜觀他倆。我從阿女身上學到兩事。一、她平時說話豪爽,但原來只要她願意,她能夠很溫柔有理。我不可輕易為人下界限。二、她當時非常有耐性,我要學習。

感恩

今朝好開心,阿女阿仔兩個都夠鐘就一齊起身,自動自覺梳洗。重話“互相幫忙“換校服: 係一齊喺衣架度拆啲校服出嚟。早餐又早早食完,重有時間玩咗幾分鐘。落街又拖住手行...真係溫馨。^^

即使如此

尋開心,件事開心正面先做。負責任,即使件事有開心有不開心有正面有負面,都去做。面對負面,不一定是”放負”,可以是愛,因為“即使如此”。(不是說我自己。我在別人身上看到。因為想學,所以寫下來,提醒自己。)

《香港好走 有選擇》--- 陳曉蕾

本書幾厚,原以為我會好似其他書咁睇(拖)好耐。結果一個禮拜睇完。

有好多資訊,但重點係刺激思考。

有啲嘢,係要趁“唔使諗住“嘅時候諗諗。若到要諗嘅時候先諗,可能冇精力同心情。

https://www.hoholife.com/products/product?variant=31869835022

自我鼓勵

阿仔雖然有時都幾扭計,但有樣嘢要讚佢。佢扭完冷靜返後,會合作聽同覆述我地嘅提醒,滿有信心咁講:“我下次會記住“。當然,唔會一學就變好,會有再扭嘅時候。但當再有相類情況但佢冇扭,就算我地未讚佢,佢都會主動話佢今次冇扭,講返我地教過乜,話佢今次做到。呢種“自我鼓勵”,大人都要學。^^

Alike: A short film

"Alike". A 8-min story for parents. The first time I watched it, I muted the sound. It is great. The second time I watched it with music on. It is amazing! Remember to turn the music on.

《香港好走》

上次去香港冇買,喺澳門買返。未睇,唔知如何。不過覺得呢個題目值得探討。如封面所講,真係關所有人事,但我喺呢方面幾乎係零知識。

(小插曲:本書12月出,我喺新書嗰邊搵唔到。問店員。佢唔使電腦,諗咗一秒,帶咗我去...社會科學個櫃度。)

補充:買咗個晚,唔覺唔覺就睇咗三章《有選擇》。好多思考(同發覺自己好多嘢冇思考過) ... 唔想停但都要停,唔知醒就麻煩。聽晚再睇。

《我係聾人,我有話講2》

睇完。我未必同意佢嘅一啲觀點,但因此更值得我睇,令我去反思自己嘅諗法。佢係聾人,又係手語導師同手語傳譯員,亦有人工耳蝸同助聽器嘅經驗。佢嘅諗法,值得參考、思考、認識、同尊重。

朝早起身

有樣嘢好欣慰,幾乎朝朝都會讚下阿女嘅:由幼稚園到而家,佢每朝都自己醒或一叫即醒,從來唔使催佢起身返學。:)

自回一:要對阿仔公平啲先,佢都越嚟越早醒,有進步。:)

感恩,得好人相助

阿仔喺巴士大扭計,嘈到成車人,搞佢唔掂。幸得一小姐相助,好快氹掂佢。感恩。令我思考數事。一,當局者迷,不妨讓人幫。二,我盡量唔讓步,係因為有長遠考慮。但旁人看,就係解決當下問題(”扭緊計“呢個問題)。利害考慮不同,做法不同。三,一向堅持“扭唔會有”,但有時會影響其他人。要平衡下。

自回一:我其實係湊緊阿仔阿女兩個。我諗點處理阿仔,重要同時考慮埋阿女點反應。如果讓得一個,又會影響另一個。

自回二:其實之前嗰程巴士已經扭咗成程。頭先係"第二集",有啲攰兼技窮。感恩有人幫口,阿仔唔敢扭陌生人計,好快被氹掂。

自回三: 不過細路仔好快又唔記得。返到屋企又開開心心,重好似局外人咁講返頭先自己扭計, 好似唔關自己咁。:)

我?

恐怖實驗:如果將一班BB複製,放喺幾個唔同年代,佢地大個會有幾唔同?年代嘅差異,有多少係時代嘅產物?如果我而家先出世,我會同現在嘅“我”有幾唔同?呢個“我”,有幾多真係「我」

(加長版)

唔係乜嘢新嘢。但睇我上幾代同下幾代時,都要多留意,多理解,多體諒。認同或不認同,都要明白背後可能嘅因由。我自己呢代嘅好壞,都唔完全係我地嘅“選擇”。

#關篇文乜嘢事? #係咪抽水? #阿媽係女人? #真係? 

https://t.co/6ipFonHdjZ

試下FB“新”用法

唔再由FB決定我睇到邊個朋友。想睇一個人嘅近況,直接打名搵。唔方便?係呀。但每一個我睇過嘅,都係我諗得到記得起專登去睇嘅。... 其實,好耐好耐以前,想知人近況,都唔會“睇報紙”或“壁報板”,係會直接打電話問人:「近排點呀?」(當然,設定收某人嘅通知都係攞返主動權嘅另一個辦法。)

少用咗FB

體驗(“實驗“)第一階段: 呢個禮拜好少冇目的咁掃FB去“睇下有乜”,多數都係睇通知,或特定朋友或專頁嘅近況。感覺幾好。:)